Алексей Цыденов «Озёрнын» ГОК-то хүдэлхэ Буряад ороной ажаһуугшадые һургахые дурадхаа
Предприятида 2,3 мянган ажалшад хэрэгтэй, тэдэнэй 90% ажалшадые нютагай зоноор хүсөөхэ түсэбтэй.
Буряад Уласай Толгойлогшо октябриин 8-да минеральна-түүхэй эдэй һалбариин ба элшэ хүсэнэй асуудалнуудта зорюулагдаһан хүрэнгэ оруулалтын оршон һайжаруулха талаар зүблэлэй суглаа үнгэргөө һэн.
- Эгэтын флюоридой уурхайн ажал энэ жэл соо яһала урагшаа ябаа. 1,1 млрд түхэригтэ уула уурхайн шанаржуулгын комбинат баригдаа. Нэгэдэхи кварталһаа бэлэн бүтээл үгэжэ эхилээ. Энэ жэл “Озёрный” ГОК-то хүрэнгэ оруулагша ерээ. Бюджедһээ гадуур хүрэнгэ оруулалтын хэмжээн – 7,7 млрд түхэригтэ хүрөө. Гадаада үндэһэн бүтэсэ байгуулагда бюджедэй туһаламжын хэмжээн – 7,7 млрд түхэриг хүрөө. Аха аймагта өөхэн шулуунай уурхайда хүрэнгэ оруулагша ерээ. Бюджедһээ гадуур хүрэнгэ оруулалтын хэмжээн – 14 млрд. түхэриг болоо. Нөөсэ эли болонхой, россиин худалдан абагшашье олдоо. Хойто аймагта калийн минеральна үтэгжүүлгын уурхайда хүрэнгэ оруулагша ерээ. Тэндэ 220 млн тонно нөөсэтэй, 100 жэлэй ажалтай. Уурхай малтаха ажалнууд эхилээ. Манда үшөө томо түсэлнүүд байна, тэдэниие бидэ бэелүүлжэ шадахабди, - гэжэ Буряад Уласай Толгойлогшо хэлээ.
«Озёрное» ООО-гой эрхилэгшэ захирал Ярууна аймагта Озёрнын полиметаллай уурхай олзолхо түсэл тухай элидхээ.
- Совет үеын гүйсэд бэшэ технологи болбол эндэхи түмэр хүдэри шанаржуулхада хүшэр гэжэ тоолоһон байгаа. Харин мүнөөнэй техникын болон технологиин хүгжэлтэ ба туулга болон цинкын захада эрилтэтэй болоһон ушарһаа энэ түсэлые эдэй засагай зорилгодо хүрэмэ ашагтай болоо, - гэжэ тэрэ хэлээ.
Түмэр хүдэри олзолхо болон болбосоруулха ба цинкын болон туулгын баяжамал үйлэдбэрилхэ талаар предприяти байгуулгада компани 70 млрд түхэригэй хүрэнгэ оруулха. Озёрнын уула уурхайн компани Дорнодахинай эдэй засагай хуралдаанда ВТБ банктай түсэл бэелүүлхэ мүнгэ һомолхо олгохо эрхэ нүхэсэл тухай хэлсээ баталаа һэн гэжэ һануулая.
Мүнөө дээрээ вахтын тосхон бэлэн болоо, тэндэ 200 хүн ажаһууна. Ноябрь соо уула малтаха, тэһэлхэ ажалнууд, объектнүүдые барилга эхилнэ, жэлэй эсэс болотор компани барилганууд руу саг зуурын харгы ба талмай барижа эхилхэ. Нэгэдэхи кварталай эсэстэ фабрика ба үндэһэн бүтэсын объектнүүд бодхоогдожо эхилхэ.
- Барилгын ажалнуудай эгээл түлэг 3 жэл соо болохо. 2024 ондо ажалай түсэлэй харуулалтануудта предприятиие хүргэхые түсэблэнэбди, тодорхойлбол, жэлдэ 8 сая тонно түмэр хүдэри болбосоруулха болонобди, - гэжэ Григорий Колдунов хэлээ.
“Озёрный” ГОК-то ажаллахын тула 2,3 мянган ажалшад хэрэгтэй болохо, тэдэнэй 90% компани Буряад ороной ажаһуугшадаар хүсөөхэ һанаатай.
- Бидэндэ захяа үгэгты: 50 бульдозеристнууд, 100 экскаваторщигууд – танда ямар мэргэжэлтэд, ажалшад хэрэгтэй байһан тухай хэлэжэ үгэгты. Бидэ тантай тусхай зорилгоор ажалшадые бэлдэхэ тухай хэлсээ баталхабди. Хүнүүдые олохобди, һургахабди, харин таанар тэдэниие ажалда абахат. Тусхай зорилгоор мэргэжэлтэдые бэлдэхэбди, - гэжэ Алексей Цыденов дурадхал оруулаа, тэрээниие Григорий Колдунов зүбшөөрбэ.
Тиихэдэ Буряад Уласай Толгойлогшо Ярууна аймагай засаг даргада Озёрнын ба Эгэтын уурхайнуудта шэнэ хоёр предприятинуудай ажал эхилхые хараада абан, аймагай ниигэмэй-эдэй засагай хүгжэлтын түсэб зохёхыень даалгаа, тэндэнь ерээдүйн ажалшадай эмнэлгэдэ хэрэгтэйнь, тэдэнэй хүүгэдэй болбосорол болон бусад ниигэмэй һуури бүтэсэ хараалагдаха болоно.
Тиихэдэ энэ суглаанда байгаалиин нөөсын сайдай орлогшо Наталья Тумуреева байгаали ашаглаха асуудалнуудаар тэрэ тоодо ашагта малтамал олзоборилхо тухай мэдээсэл хээ. Газарай нөөсэ баялиг ашаглаха эрхэ нэгэл ашагта малтамал үгтэдэг.
- Геологиин ажалнуудай ябасын үедэ зүбшөөрэл соо заагдаагүй шэнэ түхэлэй ашагта малтамалай элирбэл, газарай нөөсэ баялиг олзоборилогшо тэрэниие саашадаа олзоборилхо эрхэгүй болодог. Ябууд дундаа ашагта малтамалые абаха зорилгоор зүбшөөрэлдэ хубилалта оруулха арга боломжо байхагүй, - гэжэ Наталья Николаевна тэмдэглээ.
Урид жэлнүүдтэ хамта байһан ашагта малтамал олзоборилгодо зүбшөөрэлдэ оруулха туршалгын маягаар гансал гүрэнэй компанинуудта үгтөө һэн. Мүнөө дээрээ Россиин Минприроды газарай гүн баялиг тухай хуулида хубилалтануудые оруулха тухай хуулиин түлэб бэлдэнэ, тэрэнээр тиимэ арга газарай баялиг олзоборилогшодто тараагдахаар хараалагдана. Буряад Уласай Минприроды тус хуули дэмжээ һэн.
Зайн галай сүлжээндэ холбогдолтой холбоотой олзын хэрэг эрхилэгшэдэй ондоо асуудал тухай «МРСК Сибири» - «Бурятэнерго» ПАО-гой һалбариин захирал Сергей Козлов хөөрэжэ үгөө. Онсо хамгаалалтатай ойн участогуудта, Байгал нуурай экологиин гол зоонодо, Түнхэнэй дархан газарта модо тайраха хорюултай. Тиимэһээ шэнэ ЛЭП барижа болохогүйһөө гадна, тэрээн доогуур сэбэрлэлгэ хэхэнь хорюултай.
Буряад Уласай Толгойлогшо Зөөриин ба газарай харилсаанай яаманда ба аймагай хүтэлбэридэ газарай участок дамжуулха шатада, арендэдэ гү, али үмсэдэ үгэхын урда тээ тобшолол үгэхыень даалгаа. Участок зайн галгүй ба зайн галтай хэзээдэшье болохогүй, юундэб гэхэдэ, тойроод ой модон, тэрэниие тайража болохогүй. Булта мэдэхэ ёһотой, эндэ хэзээдэшье зайн галтай болохогүй ба альтернативна зайн гал дээрэл байха гэжэ мэдэжэ байха болоно. Үгы гэбэл, тэрэ газарһаа арсаг, - гэжэ Алексей Цыденов ойлгуулаа.
Зүблэлэй суглаанай дүнгөөр зүбшөөрэлэй, геологи бэдэрэгын ажалнуудай ба зайн галай асуудалнуудаар олзын хэрэг эрхилэгшэдтэ шухала хэрэгүүдые шиидхэлгэдэ шэглүүлэгдэһэн хэдэн даабаринууд баһа үгтөө.
↓