Нацпроектын хүреэндэ Кабанскын, Муя аймагуудта ба Северобайкальскда болбосоролой түбүүд, спортын талмайнууд, кинозалнууд бии болохо
Вторникто, октябриин 22-то Кабанскын, Муя аймгуудай ба Северобайкальск хотын засаг дарганар Буряад Уласай Засагай газарай зүблөөндэ муниципальна байгууламжануудай ниигэмэй-эдэй засагай хүгжэлтын гол шэглэлнүүд тухай элидхэлнүүдые табяа.
Нацпроектнүүдые бэелүүлгэ, тусхай харуулалтануудые дүүргэлтэ ба тэдэниие туйлаха талаар үнгэргэхэ хэмжээ ябуулганууд тухай тоосохыень муниципалитедүүдэй бүхы хүтэлбэрилэгшэдтэ уласай толгойлогшо Алексей Цыденов даалгажа, аймагуудай засаг дарганар бүхы объектнүүдые ба хэмжээ ябуулгануудые сээжэ мэдэхэ ёһотойт гэжэ хэлээ һэн.
Кабанскын аймагай засаг дарга Алексей Cокольников муниципалитет юһэн үндэһэн түсэлнүүдтэ хабаадана гэжэ хэлээ.
2019 ондо “Соёл” үндэһэн түсэлөөр аймагай түбтэ автоклуб ерээ, Сэлэнгын, Каменскын, Кабанскын, Выдринай хүүгэдэй уралигай һургуулинуудта дүрбэн фортепиано ерээ, ноябриин дууһатар Каменскын соёлой-мэдээсэлэй түбэй кинозалда тоног түхеэрэмжэ худалдан абтаха.
Ерэхэ жэлдэ Клюевка һууринай клубта ехэ заһабарилга хэгдэхэ. 2024 он болотор Бабушкинда соёлой хүгжэлтын түб баригдахаар түсэблэгдөө, Хандала улуста ба Береговая һууринда соёлой байшангуудта ехэ заһабаринууд хэгдэхэ.
“Болбосорол” нацпроектээр энэ жэлдэ 100 һууритай Клюевкын һургуули барилга болоно. 2020 ондо Выдринай ба Кабанскын һургуулинуудта “Точка роста” гэһэн тоон системын ба хүмүүнлиг мэргэжэлэй болбосоролой түбүүд байгуулагдаха.
2020 онһоо 2023 он болотор Кожевин В.Е. нэрэмжэтэ Каменскын лицей, Мысовын 56 дугаар һургуули, Сэлэнгын гимнази олон үүргэтэ түхеэрэмжэнүүдээр, ноутбукуудаар, интерактивна согсолборинуудаар хангагдаха.
“Хүн аманай зүй” нацпроектээр олимпиин нөөсын һуургуулинуудта спортын тоног түхеэрэмжэ, ГТО-гой тестын мунициальна түбүүдтэ тоног түхеэрэмжэ ерэхэ. 2020 ондо Кабанск һууринда спортын согсолбори ба Шигаевта, Оймурто ба Ехэ Хударида спортын талмайнууд баригдаха.
«Элүүрые хамгаалга” үндэһэн түсэлэй хүреэндэ Кабанскын ЦРБ-дэ эмнэлгын туһаламжа үзүүлхэ мобильна согсолбори ерээ. 2019 ондо Горный тосхондо ФАП баригдана. 2020 ондо Береговая, Сухая ба Большая Речка һууринуудта ФАП-ууд баригдахаар хүлеэгдэнэ.
2024 он болотор “Гэр байра ба хотын оршон” гэһэн үндэһэн түсэлөөр аймагта болбосон түхэлтэй ниитын газарнууд 11-һээ 47 болотор нэмэхэ.
Аймагай захиргаан 2020 ондо “Экологи” гэһэн нацпроектдэ орохын тула түсэлэй бэшэг баримта бэлдэнэ. “Сэбэр уһан” гэһэн нютаг можын түсэлдэ Закалтус һууринда уһанай худаг ба уһаар хангаха сүлжээ, Творогово, Кабанск һууринуудта, Бабушкин хотодо ба Каменск тосхондо худаг барилга түсэблэгдэнэ.
Северобайкальскын засаг дарга Олег Котовой хэлэһээр, 2019 ондо “Соёл” үндэһэн түсэлэй хүреэндэ хотодо муниципальна номой сан байгуулха талаар ажалнууд дүүргэгдэжэ байна, тэрэнь ноябриин 8-да нээгдэхэ. 2020-2024 онуудта хүүгэдэй уралигай һургуули хүгжэмэй зэмсэгүүдээр, тоног түхеэрэмжэнүүдээр ба һургалтын материалнуудаар хангагдаха. 2023 ондо виртуал тоглолтын заал байгуулхаар түсэблэгдэнэ.
2019 оной эсэс болотор “Болбосорол” үндэһэн түсэлэй хүреэндэ соо 1 ба 3 дугаар һургуулинууд олон үүргэтэ түхеэрэмжээр, ноутбугаар, интерактивна согсолборинуудаар хангагдаха. 2022 он болотор хотодо 11 дүгээр һургуулиин, 5 дугаар гимназиин ба 6 дугаар лицейн дэргэдэ тоон системын ба хүмүүнлиг мэргэжэлэй болбосоролой “Точка роста” түбүүд байгуулагдаха.
“Хүн аманай зүй” үндэһэн түсэлөөр “Алтан түлхюур” хүүгэдэй сэсэрлигэй үндэһэн дээрэ сэдьхэл зүйн-багшын, мэдээсэлэй-гэгээрүүлгын дэмжэлгын ба түрэлхидтэ зүбшөөл үгэхэ түб байгуулагдаха.
2020 ондо “Жэжэ ба дунда олзын хэрэг эрхилэлгэ ба олзын хэрэг эрхилэлхэ үүсхэл дэмжэлгэ” гэһэн үндэһэн түсэлэй хүреэндэ “Минии бизнес” түб нээгдэхээр хараалагдана.
2019 ондо “Гэр байра ба хотын оршон” үндэһэн түсэлөөр хотын сэсэглиг ба гурбан хотоной дэбисхэрнүүд болбосон түхэлтэй болохо. 2024 он болотор 58 хотоной ба гурбан ниитын дэбисхэрнүүд болбосон түхэлтэй болгоогдохо.
Муя аймагта мүнөө дээрээ зургаан нацпроектнүүдээр хэмжээ ябуулганууд бэелүүлэгдэнэ гэжэ муниципалитедэй хүтэлбэрилэгшэ Андрей Козлов хэлэнэ.
“Болбосорол” үндэһэн түсэлэй хүреэндэ байгша ондо болбосоролой эмхи зургаануудта ехэ заһабаринууд хэгдээ ба һургуулиин автобус абтаа. Эрэмдэг хүүгэдтэ тусхай түхеэрэмжэ абтаа. Дүтын табан жэлнүүд соо болбосоролой хойто эмхи зургаануудта 50 Мб/с доошо бэшэ хурдатай интернет-сүлжээгээр хангагдаха. Иракиндын ба Муя-Адагай һургуулинуудта “Точка роста” түбүүд байгуулагдахаар түсэблэгдэнэ. Тиихэдэ аймагай болбосоролой эмхи зургаануудта эд хэрэгсэлэй-техникын база шэнэлэгдэхэ.
2020 ондо “Соёл” нацпроектээр Северомуйск тосхондо соёлой байшанда ехэ заһабарилга хэгдэхээр түсэблэгдэнэ. 2022 он болотор үшөө гурбан соёлой байшангууд заһабарилагдаха, тэдэ тоодо Муя-Адагай номой сан. Энэл хугасаада Таксимодо хүүгэдэй уралигай һургуули баригдаха. 2024 он болотор соёлой табан эмхинүүд мүнөөнэй тоног түхеэрэмжэнүүдтэй болохо. “Гэр байра ба хотын оршон” үндэһэн түсэлэй хүреэндэ аймагта хоёр ниитын газарнууд байгуулагдаха.
2024 он болотор хүсэндөө байха үндэһэн түсэлнүүд Ородой Холбоото Уласай Юрэнхылэгшын “май һарын” Зарлиг дүүргэлтэ болгон зохёогдоһон ба баталагдаһан гэжэ һануулнабди.
↓