Ноябриин 7-до Буряад Уласай Толгойлогшо Алексей Цыденов Бэшүүр аймагта ажалаар айлшалжа, һуури бүтэсын, хүдөө ажахын ба ниигэмэй һалбариин объектнүүдые үзэбэ. Ябаһанай дүнгөөр уласай толгойлогшо хэдэн даабаринуудые үгөө.
Алексей Цыденов грантын дэмжэлгэдэ хүртэһэн нэгэ хэды фермерэй ажахынуудые ошожо хараа. Аймагта бүхыдөө 14 хүдөө ажахын үйлэдбэринүүд, 86 фермерэй ажахынууд, 9,3 мянган үмсын хамһабариин ажахынууд тоологдоно. 2019 ондо аймагай хүдөө ажахын һалбариин хүгжэлтэдэ 65,1 сая түхэриг һомологдоо.
- Манай улас юрэнхы дээрээ хүдөө ажахын лэ болодог. Буряад Уласта промышленнэ үйлэдбэринүүд яһала олон, зүгөөр тэдэнэр хуу ами аминдаа холбоогүй хүдэлдэг. Хүдөөдэ хүнүүд голдоо хүдөө ажахыда хүдэлнэ. Тиимэһээ энэ һалбари хүгжөөлгэ болбол засагай газарай ажалай түрүү ээлжээнэй зорилгонуудта ородог. Залуу фермернүүдые дэмжэлгын программанууд ба тэдхэмжэнүүд хүнүүдтэ газар дээрэ өөрынгөө ажал эхилхэдэ туһа болоно. Бидэнэй хүрэһэн фермэдэ залуу хүн 3 сая түхэриг абаа, тэрэ мүнгөөрөө трактор, бодо мал худалдажа абаад, ажал хэжэ эхилээ. Бидэнэй хаража байхада, хүл дээрээ бата зогсоно, өөрөө өөртөө эзэн, ажалаа сайн хэнэ. Тиимэһээ иимэ дэмжэлгэ хэрэгтэй, нүгөө жэлдэ энэ шэглэл баһа үргэлжэлүүлэгдэхэ, - гэжэ Алексей Цыденов хэлэнэ.
Тиихэдэ уласай толгойлогшо заһабарилга хэхээр болоһон хэдэн һургуулинуудта хүрөө. Тэдэниие хараһанай удаа Потанино, Буй ба Шэбэртэ һууринуудта заһабари хэхэ ба шэнэ һургуулинуудые бариха талаар түсэлэй-сметын бэшэг баримтануудые аймагта бэлдэхэ тухай шиидхэбэри абтаа.
- Хүдөөдэ байдал һэргээхын ба иишэ хүнүүдые бусаахын тула нэгэдүүлһэн ажал хэрэгтэй. Ажалай һууринууд байха ёһотой, фермерэй ажахынуудые хүгжөөхэ ба болбосоролдо, элүүрые хамгаалгада, соёлдо - ниигэмэй һайн эрхэ нүхэсэл байгуулха хэрэгтэй. Бидэ һургуулинуудые заһабарилнабди, жэжэ һургуулинуудые хаангүй, һурагшадай үсөөн болоошье һаань, дэмжэжэл байнабди, - гэжэ Буряад Уласай Толгойлогшо тэмдэглээ.
Буряад Уласай Болбосоролой ба эрдэм ухаанай яаманай мэдээсэһэнэй ёһоор, 2018 ондо аймагай долоон һургуулинуудта, юһэн хүүгэдэй сэсэрлигүүдтэ ехэ заһабарилганууд хэгдээ, Хонхолойн һургуулида залгаа байра баригдаа ба һургуулиин дүрбэн автобусууд худалдан абтаа. 2019 ондо Бага Хуналиин һургуулида ехэ заһабари хэгдээ.
Бэшүүр тосхондо Алексей Цыденов энэ жэлэй август соо эхилһэн спортын түб барилга ошожо хараа. Баскетболой, волейболой ба бусад талмайнуудтай хоёр дабхар байшан бодхоолгын үнэ сэн – 107 сая түхэригтэ хүрэнэ. Тус объект 2019 оной декабрь соо тушаагдахаар түсэблэгдэнэ. Тиихэдэ уласай толгойлогшо Шэбэртэ һууринда “Красногорка” ТОС-ой хүсөөр баригдаһан ГТО-гой нормо тушаахын тула спортын талмай хараа. Спорт талмайн тоног түхеэрэмжэдэ алас дурнын тэдхэмжын хүреэндэ 3,1 сая түхэриг һомологдоһон байна.
- Энэ жэл ГТО-гой нормо тушааха 15 талмайнууд баригдаа. Ехэнхи хубинь – аймагуудта. Нүгөө жэл тиимэ программа баһа хүдэлхэ. Спортын объектнүүд манай уласта баһа баригдана. Бэшүүртэ – спортын-элүүржүүлгын согсолбори, Хэжэнгэдэ – стадион, Онохойдо гиирь үргэлгын түб нээгдээ. Үшөө томо хэмжээтэй, томо тоног түхеэрэмжэтэй нээмэл түхэлэй спортын-элүүржүүлгын согсолборинууд уласта бии. Эдэ болбол манай хүнүүдэй ажабайдалай шанар дээшэлүүлхэ, һуурин һэргээхэ, уласай хүгжэхын тула хэгдэнэ, - гэжэ Алексей Цыденов тэмдэглээ.
Ажалаар айлшалалгын эсэстэ толгойлогшо нютагай ажаһуугшадтай уулзаа ба сайдуудтай хамта асуудалнуудта харюунуудые үгөө. Шанартай ууха уһа, аяншалга ба хүдөө ажахы хүгжөөлгэ, “Мухар-Шэбэр-Бэшүүр-Хяагта” гэһэн нютаг можын удха шанартай харгы заһабарилга, юрэнхы болбосоролой эмхи зургаануудые барилга – иимэ сэдэбүүд уулзалгада хэлсэгдээ.
- Юрэнхылэгшын Зарлигаар 100 хүнһөө дээшэ хүн зоной тоотой бүхы һуурин газарнуудта ФАП-ууд бии болохо. Аймагай түб больницанууд шэнэ тоног түхеэрэмжэнүүдээр тоногжуулагдаха – алас дурнын тэдхэмжээр энэ хэрэгтэ миллиард түхэриг шэглүүлэгдээ. Бэшүүр аймагта баһа шэнэ түхеэрэмжэнүүд ерэнэ. Мүнөө юрэнхылэгшэ элүүрые хамгаалгын эхин шатын һалаа хүгжөөхэ талаар даабари үгөө, июлиин 1-һээ тэрэ программа хүдэлжэ эхилхэ. Тэрэ программа бүхы уласаар хуушан ФАП-уудые, амбулаторинуудые, юрэнхы практикын эмшэдэй офисуудые, аймагай түб больницануудые, түхеэрэмжэнүүдые заһабарилга хараална, - гэжэ толгойлогшо хэлээ.
Аймагай һуури бүтэсын асуудалаар ехэ асуудал гараа. Минтрансын хэлэһээр, 2019 ондо “Мухар-Шэбэр-Бэшүүр-Хяагта” автохаргы ба Ара Хэрээтэ горхон дээгүүр хүүргэ заһабарилгада 8,37 сая түхэриг һомологдоо. Дабаата горхон дээгүүр хүүргэ һэльбэн шэнэлэлгэ эхилээ. 24-34 км участокта нэмэлтэ харгын түхеэрэмжэтэй “Мухар-Шэбэр-Бэшүүр-Хяагта” автохаргын ехэ заһабарилгада түсэлэй-сметын бэшэг баримтанууд бэлдэгдэнэ. Ажалай дүтэрхы мүнгэниинь 380 сая түхэриг. Харгын үшөө хоёр участогуудта ехэ заһабарилгада түсэлэй-сметын бэшэг баримтанууд бэлдэгдэһэн байна, 2020 онһоо ажалнууд эхилхэ, харин 2021 ондо дүүргэгдэхэ.
Буряад Уласай толгойлогшо Буряад Уласай ба Үбэр Байгалай хизаарай хоёрой хоорондо байһан Бэшүүрэй аймагта эзэгүй хүүргын талаар шиидхэбэри тухай хэлээ: хүүргэ мүнөө эзэгүй. Тэрэнэй байдал нэгэ бага заһабарилхын тула өөһэд дээрээ бэшэжэ абахабди. Хахад жэл соо бэшэг баримтань бэлдэгдэхэ байха. Тэрэнэй удаа тэрэниие ябахаар болохоор шэнэлжэ, бүтэн болгохобди. Түсэл бэлдэхэ ба тэрэниие заһабарилха хэрэгтэ үшөө 1,5 жэл үнгэрхэ”.
- Бидэ аймагуудаар ходо ябажа, хүнүүдээр уулзанабди. Иимэ ябадалнууд эгээл хүндэ асуудалнуудые эли гаргадаг. Ябаһанай дүнгөөр яамануудтай тодорхой шиидхэбэринүүд абтадаг. Энэ болбол бодото шалгалта, тиимэһээ жэл үнгэрһэн хойно удаадахи ябалгада нютагай ажаһуугшадай захилгаар юун хэгдээб, хэгдээгүйб гэһэн асуудалда харюу үгтэнэ, - гэжэ Алексей Цыденов ажалаар ябаһанай дүн гаргаа.
↓