Кабанскын аймагай Селенгинск тосхондо алас дурнын “нэгэдхэмэл” тэдхэмжын хүреэндэ ниигэмэй гурбан объектнүүдтэ ехэ заһабарилга хэгдээ.

Кабанскын аймагай эгээл томо эмнэлгын эмхи зургаануудай нэгэн болохо гол байра - 16 мянган хүниие хангадаг Сэлэнгын аймагай эмнэлгэ 50 гаран жэл соо заһабари хүлеэгээ бшуу.

Эмнэлгын эмхи зургаанай байра 1957 ондо баригдаһан. Газаа ба досоо тала шэнэлэлгэ болбол шиидхэхэ хэрэгэй багахан хубинь болоно. Талмайн дуталдаһанһаа боложо, эмнэлгын һэргылэмжын танхим, диспансеризациин, флюорокартотекын танхим үгы байгаа. Энэ жэл ехэ заһабарилгада 27 сая түхэриг гаргашалагдаа. Дулаасуулгын, уһаар хангалгын, канализациин сүлжээн шэнэлэгдээ.

- Аймагай элүүрые хамгаалгын хэрэгтэ энэ ехэ шухала объект юм. Кабанскын аймагай түб эмнэлгэтэй хамта энэ ехэ үүргэ дүүргэдэг. 4 һуурин газарнуудые: Селенгинск тосхон, Тресково һуурин, Таракановка һуурин ба Брянск һууринуудые энэ хангадаг. Алас дурнын “нэгэдхэмэл” тэдхэмжын тоосоогоор энэ байрада ехэ заһабарилга хэгдээ, ариг сэбэрэй эрилтэнүүдтэ тэрэниие гүйсэд хүргөөбди. Тэрэ тоодо, эрэмдэгтэй хүнүүдэй байрада орохо боломжо хараалагдаа. Хоёрдохи хэмжээ ябуулга болбол тус эмнэлгын хоол шанаха газарта ехэ заһабарилга болоо. Хоол шанаха газарта үнинэй заһабарилга хэгдээгүй байгаа. Мүнөө объект гүйсэд хэгдээ, ба бидэнэр тэрэниие ажалдань оруулаабди, - гэжэ Буряад Уласай элүүрые хамгаалгын сайд Дамбинима Самбуев хэлэнэ.

Агааржуулгын системэ ба эмнэлгын эдеэ хоолой газарай канализаци заһабарилгада, эндэ 10 жэл заһабари хэгдээгүй газарта 3 сая түхэриг шэглүүлэгдээ. Талмайнуудай сүлөө болоһоной ашаар түүхэй эдеэ болбосоруулха ба эдеэ шанаха цехүүд зохихо эрилтэнүүдтэ хүргэгдөө, ажалшадай ариг сэбэрэй таһалга бии болоо.

- Сэлэнгын аймагай эмнэлгэдэ алас дурнын тэдхэмжын тоосоогоор нэмэжэ эндоскопиин тоног түхеэрэмжэ, рентген-аппаратура, ультразвуковой аппарат худалдан абтаа. Шэнээр мүнгэ хубаарилгын тоосоогоор маммограф ба флюорограф тодхогдоо. Юрэнхы дээрэнь хэлэбэл, эмнэлгэ хуу шэнээр тоногжуулагдаба, - гэжэ сайд хэлээ.

Тиихэдэ Селенгинскдэ энэ намар Буряад орондо хүдөөгэй эгээл томо харагшадай заал болохо “Жемчужина” соёл-спортын согсолбориин “Б” блогто заһабари хэгдээ. Тус байшан соо 500 хүнэй һууритай харагшадай зал, бүжэгэй зал, гримёрно ба декорациин склад байна.

1983 ондо ашаглалда тушаагдaһан байра һүүлэй жэлнүүдтэ дулаагаа алдадаг болоо һэн. Тэрэ асуудал шиидхэхын тула сонхонууд һэлгэгдээ ба урда талаһаа газаа талын хана дулаалагдаа. 8 сая гаран түхэригтэ ажалнууд хэгдээ.

Буряад Уласта эдэй засагай ургалтын ниигэмэй хүгжэлтын түбүүдэй түсэбтэ ороһон тосхоной гурбадахи объект – уласта хүдөө аймагуудта ори ганса анагааха ухаанай мэргэжэлэй болбосоролой эмхи зургаанай Байгалай анагааха ухаанай коледжын хамтын байра болоно. 150 оютадай байха байра 1967 ондо нээгдэһэн үдэрһөө забарилгада ороогүй байгаа. Досоохи ажалнуудта, байрын хушалта, уһаар хангаха, дулаа үгэхэ ба канализациин системэ шэнэлэлгэдээ, хана дуулаалгада, шала, үһээ ба сонхонуудые һэлгэхэдэ 23,9 сая түхэриг һомологдоһон байна.

2019 оной март соо Ородой Холбоото Уласай Засагай газарай Түрүүлэгшын орлогшо – ДФО-до ОХУ-гай Юрэнхылэгшын бүрин эрхэтэ түлөөлэгшэ Юрий Трутневай хүтэлбэри дорохи подкомисси Буряад Уласай эдэй засагай ургалтын ниигэмэй хүгжэлтын түбүүдэй түсэб (“нэгэдхэмэл” тэдхэмжэ) баталан абаа һэн. Тэрээндэ эхин дээрээ 73 хэмжээ ябуулганууд оруулагдаһан байгаа. Удаань Түсэбтэ 19 хэмжээ ябуулганууд нэмэжэ оруулагдаа. Һомололгын мүнгэн бүхыдөө – 6,8 млрд түхэриг.